المسافر ! ولكن

كتير قرأت في مشكلات سرك في بير ناس خايفة انها متعرفش تتغير او ناس شايفة انها مش كويسة ومش هتعرف تتغير

انا عايز احكي موقف حصلي ولما تفكرت فيه تأثرت بيه جداً

قبل التزامي .. كنت بدخل على النت بردو بس مكنتش بدخل منتديات كنت في الشات بس

المهم اتعرفت على بنت واتكلمنا وتطور الموضوع للتليفون ثم قلت لها عايز اشوفك وهي طلعت من اسكندرية وانا من القاهرة وكنت ساعتها في الكلية لسا ..

فكبرت في دماغي وقلت لازم اروح اقابلها وبالفعل نزلت من بيتي على اني رايح الكلية وزوغت وروحت اسكندرية عشان بس اشوفها

وقضيت اليوم ورجع تاني بليل ..

ربنا سبحانه وتعالى بمرور الايام والمواقف هداني وتاب عليا .. واتغيرت بفضل الله

بعدها بسنة بالظبط

سافرت اسكندرية بنفس الطريقة وكأني رايح الكلية وسافرت اسكندرية عشان احضر درس لأحد مشايخنا في اسكندرية .. ووالله ما نزلت من بيتي ولا سافرت إلا لحضور الدرس ورؤية مشايخنا .. الافاضل

وانا في الطريق في السفر قلت بيني وبين نفسي ياااه ده انا من سنة بالظبط كنت على سفر لنفس المكان عشان اقابل بنت معرفش عنها اي شيء وكان سفر معصية ودلوقتي بعد سنة بالظبط بسافر واقطع السفر عشان بس احضر درس !!

فسبحان مغير الاحوال وسبحان الهادي جل في علاه

يهدي من يشاء .

انا بحكي القصة دي أولاً تحديثاً بفضل الله عليا وان ازاي ربنا سبحانه وتعالى يقلب القلوب

وايضاً عشان اعرف الناس الي لسا في بداية الطريق ان مفيش شيء صعب على ربنا .. انت بس حاول وخد خطوات وربك الهادي ..


جزاكم الله خيراً .