دعوت ربي بقلب مجروح فكافأنى

حبيت احكى لكم قصتي مع التوبه لعلها تصبح سببا فى توبه احد

انا كنت فتاه عاديه جدا واقل كمان ولا كنت بصلي ولا بقرأ قرأن بس كان قلبي دايما بيوجعنى اوى لما بعمل حاجه وحشه كان ضميري لسه صاحي والحمد لله وكان كل من حولى يشهدون لى بطيبة القلب بس انا من جوايا مكنتش راضيه عن نفسي خالص وكان فى ذنوب خفيه تقتلنى
المهم مره كنت قاعده مع قرايبى كلهم وكانت قعده بنات كلها معاصي للاسف غيبه ونميمه وشتايم وحاجه لا تطاق وفجأه لقيتهم كلهم اخدونى انا التريأه بتاعتهم قعدوا يجرحونى بالكلام ويرمون بالالفاظ وانا اتألم فى صمت وكان قلبي واجعنى اوى ومش عارفه ارد عليهم فقمت مشيت وروحت بيتنا وانا طول الطريق بعيط بشكل هستيري واول ما دخلت البيت لقيت اخويا مشغل تواشيح دينيه وكان اللى شغال وانا داخله ( مولاي انى ببابك ) للنقشبندي . فسمعت التوشيح ده وقعدت اعيط اوى اوى وقلت ياااااااااااااااااه اول مره احس انى عايزه اترمي فى حضن حد ويخفف عنى فقمت متوضيه ومصليه ركعتين وقعدت فى السجود ادعى لدرجه انى اغم عليا من العياط فى السجود
واخويا جه فوقنى وقالى مالك قلتله مفيش تعبانه شويه وعايزه انام
ونمت وحلمت اجمل حلم فى حياتى ... حلمت بانى كنت ماشيه فى نفس الطريق اللى كنت مروحه منه امبارح وانا بعيط وفجأه لقيت راجل جمييييييييييل اوى فقالى مالك قلتله مفيش زعلانه وقرفانه فقالى انتى عارفه انا مين قلتله لا معرفش فقالى انا محمد ابن عبد الله .......
جسمي كله بقى بيتنفض فى الحلم وقعدت اقوله مش ممكن انت رسول الله يعنى دى حقيقه مش حلم فقالى نعم دى حقيقه
وقالى اشكيلي همك فقلتله اللى مزعلنى فطبطب على كتفى وقالى تعالى نصلي فى المسجد ركعتين وصلى بيا امام ولم يكن فى المسجد غيري وغيره فقط .. وصحيت من الحلم وانا منهاره من العياط وبقول بصوت عالى يا حبيبى يارسول الله ياحبيبى يارسول الله .

بعدها بيومين حلمت حلم اعظم واعظم حلمت انى اخذت فى مكان زى ما تكون غرفه كده ومطلوب انى ادخلها وهى تبان انها جهنم لكن مجرد ما دخلتها لقيتها بارده وجميله اوى وبعدها عدى ناس ادونى مياه غريبه اوى عباره عن حبات لؤلؤ فى ابريق مرصع بالجواهر فشربت منها والله لحد دلوقتى حاسه بطعمها فى فمي
وبعدها سألت ناس قلتلهم احنا فين قالولى احنا دلوقتى حنصلي فى حضره رب العالمين ...............
تخيلووووووووووو بقى معناها ايه وصليت فعلا وصحيت بعدها من الحلم والله ما كنت عايزه اقوم
ومن وقتها وانا ربنا قذف فى قلبي الايمان الحمد لله واكرمنى بتقاه واكرمنى بلبس النقاب بعدها

وبعدها حلمت وشفت رؤي كتيره عظيمه مش عايزه احكيها علشان مطولش عليكم اكتر من كده

فرساله الى كل صاحب او صاحبة معصيه
جرب مره تدعي ربنا وانت بتعيط وقوله يااااااااااااااااااااارب باعلى صوتك توب عليا انا تعبت من البعد عنك وشوف ربنا حيتقبلك ولا لا ؟؟
بس متقعدش محلك سر وتقول اصل ربنا مش رايدلى توبه روح له انت الاول وبعدين شوف حيقبلك ولا لا

اسفه للاطاله