قصة هدايتى ورؤيتى للشيطان في المنام

قصتى زى قصص كثير كنت بنت عادية مبصليش إلا نادرا مش محجبة ومش ناوية اتحجب إلا لما أكبر واعدي الثلاثين ، مدمنة أغاني وأفلام انجلش ، مرتبطة بزميل ليا في الكليه
كان أهم حاجة في حياتى اللبس كان عندى اكثر من 25 طقم
همي انى ابقى جميلة وفعلا أول سنة في الكليه خدت لقب أجمل بنت في الدفعة
بس ده ميمنعش أنى كنت متربية كويس وعندى حدود فى حاجات كثير قوى

ده كان حالي لحد ما جالى حاله ضيق شديد وقلت اغير حياتى وفكرت بالحجاب

وفي يوم كان عيد ميلاد واحدة صحبتنا وروحنا كافيه عشان نحتفل ( كنا بنات وولاد ) وعادي كنا بنخرج بعلم أهلنا !!!

المهم الكافيه ده كان غريب بيتنزله بسلالم وشكله مريب ولما دخلنا كان في واحدة لبسها سىء جدا بترقص قدام المرايا مع نفسها كده

انا دخلت اتصدمت هم قعدوا يتكلموا وانا قعدت ابص للوضع حواليا وفجأه انفجرت في العياط وقلتلهم انا مش هقعد في المكان ده أبدا

حسيت انى بضحك على نفسى بالكلام عن الحدود الى انا عملاها وقررت البس الحجاب
قلبت الدولاب ملقتش حاجة تصلح إلا تي شيرت بكم واحد كنت جيباه للبيت على البنطلون الواسع الوحيد الى عندى وقلبت الدنيا عند ماما عشان الاقى ترحة تنفع عليهم لحد ما لقيت واحده لونها يمشى
ماما زعقت وقالت انى بحطها قدام الأمر الواقع وأنها مش هتدفع ألف ولا اتنين عشان لبس قلتلها مش عاوزة حاجة
وبعد ال25 طقم روحت بالطقم العجيب ده الكليه !

والتريقة والكلام معروفين

ومع الحجاب انتظمت في الصلاه ودخلت مسجد الكليه لأول وسمعت حلقات بدأت اسمع دروس واتغير شوية بشوية
بعد حجابى بشهر كان رمضان ولأول مره فى حياتي أصلى التراويح في المسجد كنت حسه إني بتولد من جديد
وفي مسجد الكليه وزعوا علينا ورد محاسبة فيه الأذكار وصلاة الضحى والتهجد والسنن
نزلت لأصحابى افرجهم على الجدول اتريقوا عليا بس أنا كنت مبسوطة لإنى أول مره أعرف الحاجات دى وبدأت لوحدى وانتظمت عليهم كلهم ولأول سنه أحس رمضان مختلف مش مسلسلات

وفى العشر الأواخر سمعت عن صلاه التهجد واستغربت وسألت واحده بيصلوا كثير كده بليل ؟ قالتلى اه وسألتها النساء كمان قالت أة

كنت فرحانة قوى كنت حسه انى اكتشفت اكتشاف وروحت فعلا مع اخويا وصلت التهجد للعشره كلهم
أول مره اعرف يعني ايه بكاء من خشية الله

وبعد رمضان صليت العيد لأول مرة في حياتى !
صحيح أنا كنت في الكليه بس كنت عمرى ما صليته

طلعت من رمضان وقطعت علاقتي بزميلى وبطلت اسمع اغاني
وقررت ابطل لبس بنطلونات بعد ما كنت اشتريت طقمين !
ووقتها ماما كنت لسه بتلبس بنطلونات فرفضت تشترى لبس تانى

وقعدت سنة كامله بطقم واحد ! ومش هقولكم على الكلام الى كنت بسمعه

ولا الإحساس بإنى فجأه بقيت لوحدى أهلى اصحابى الإنسان الي كنت مرتبطه بيه كله مبقاش زى الأول

ولكن كنت فرحانه لإنى بقرب من ربنا احساس رائع وكأني بكتشف حياة جديده

ربنا ثبتنى وشفت رؤية


شفت كأنى واقفة بصلى فى قودتى وكأنى واقفة على زجاج شفاف والزجاج تحته نار ولكن أنا الأرض تحتى باردة وجميلة ومش متأثرة بالنار وكأن الشيطان حواليا في القوده أنا مش شيفاه لكن حسه بوجوده
وبرغم وجوده والنار الي تحتى كنت واقفة أصلى وارتل القرآن بصوت جميل ومش خايفة من أى حاجة
ومفيش حاجة مأثرة عليا



استبشرت قوى بالرؤية دى واستمريت في طريقى وقربت أكثر من ربنا وبرغم إن كان في فترات انتكاس إلا انى كنت برجع تانى اتوب واقرب لربنا

ورجعت اهتميت بلبسى ورجعت لأناقتى من تانى
ولكن كان عندى طموح أنى احسنه
فلبست تونيكات وترح كبيرة
وبدأت بطقم واحد وسيبت كل اللبس الى فى الدولاب !

ولما كثروا والعدد بقى مناسب فكرت في النقاب
وبدأت بطقم واحد برضه وقعدت فتره بيه

ولما كثروا كنت عاوزة البس الملحفة

وكأن ربنا كان بيخرج من قلبى حب اللبس والمظهر ففى كل مره ارضى عن عدد الأطقم ونوعها وسعرها كنت اسيبها لله واخد خطوة تانية فى اللبس

والحمد لله حياتى اتغيرت وختمت القرأن وثابته على الإلتزام بقالى أكثر من 7 سنين بفضل الله



ووالله لو حد كان قالى انى هكون كده قبل ما اتحجب مكنتش هصدق
ولكن والله التغير ممكن ومش مستحيل أبدا
وكل واحد أو واحدة شايفين انهم وحشين ومش ممكن يلتزموا غلطانين
لإن رحمة ربنا واسعه جدا ومفيش حاجة صعبه عليه

معلش طولت عليكم

ربنا يرزقنا الثبات كلنا حتى نلقاه